កូរ៉េខាងជើងត្រៀមរូចស្រេចនឹងបើកមហាសន្និបាតបក្សជាលើកទី១
នៅថ្ងៃសុក្រនេះ កូរ៉េខាងជើងត្រូវបើកមហាសន្និបាតបក្សជាជាផ្លូវការ និងលើកទី មួយ គិតចាប់ពីឆ្នាំ១៩៨០មក។ មហាសន្និបាតដ៏ធំមិនធ្លាប់ ដែលធ្វើឡើងក្នុងអត្ថន័យពង្រឹងអំណាចប្រមុខបក្សក្មេងខ្ចី គីម ជុងអ៊ុន នេះ អាចមានរយៈពេលពីបួន ទៅប្រាំថ្ងៃ និងបានឆ្លងកាត់ការរៀបចំ ព្រមទាំងការហាត់ត្រៀម អស់រយៈពេលជាងពីរខែមកហើយ។
បក្សពលករ បក្សកុម្មុយនិស្តតែមួយគត់កាន់អំណាចនៅកូរ៉េខាងជើង មិនដែលរៀបចំមហាសន្និបាតអស់រយៈពេល៣៦ឆ្នាំមកហើយ។ តែនៅថ្ងៃនេះ ក្រោមអំណាចរបស់ប្រមុខដឹកនាំដ៏ក្មេងខ្ចី គីម ជុងអ៊ុន កូរ៉េខាងជើង បានបើកទំព័រថ្មី អញ្ជើញភ្ញៀវកត្តិយសរាប់ពាន់នាក់ ជាប្រតិភូមកពីគ្រប់ខេត្តក្រុងនៃប្រទេស និងបានអញ្ជើញអ្នកសារព័ត៌មានជាតិនិងអន្តរជាតិ ឱ្យចូលរួមតាមព្រឹត្តិការណ៍មហាសន្និបាតផង។ ពិតជាពុំធ្លាប់មានឡើយ សម្រាប់កូរ៉េកុម្មុយនិស្ត ដែលតែងមានភាពសង្ស័យលើប្រព័ន្ធឃោសនាបរទេស។សូមបញ្ជាក់ថា នេះជាមហាសន្និបាតលើកទី៧ គិតចាប់តាំងពីរបបកុម្មុយនិស្តបានបង្កើតឡើងដោយប្រមុខគីមអ៊ីលស៊ុង ដែលត្រូវជាជីតាបង្កើតរបស់ លោក គីមជុងអ៊ុនមក។ ពលរដ្ឋចាស់ក្មេង បានចូលរួមរៀបចំកម្មវិធីយ៉ាងសកម្ម និងប្រកបដោយក្តីគោរពបំផុតចំពោះអគ្គមគ្គុទេសក៍គីម ជុងអ៊ុន។ នេះបើតាមប្រសាសន៍ពលករម្នាក់ ដែលធ្វើការឱ្យក្រុមហ៊ុនផលិតអង្ករ និងដែលកំពុងហាត់សមរាំកាន់ផ្កា មកកាន់ភ្នាក់ងារសារព័ត៌មានReuters។
ជាសរុប មានពលរដ្ឋកូរ៉េខាងជើងប្រមាណជាងបីលាននាក់ បានត្រៀមលក្ខណៈតាំងពីជាងពីរខែមកហើយ ! ហើយរហូតមកទល់នឹងល្ងាចថ្ងៃព្រហស្បតិ៍ម្សិលមិញ គេនៅតែបន្តឃើញមនុស្សម្នាចំណាស់ៗ នាំគ្នាកាត់ច្រឹបតម្រឹមស្មៅ លាបពណ៌ដើមឈើមួយកំណាត់ក្រោមឱ្យសចាំងភ្លេក ... ក្រុមព្យុហយាត្រាបន្តដើរសម ក្រុមអ្នកចម្រៀងហាត់សាក យ៉ាងសស្រាក់សស្រាំ ដើម្បីកុំឱ្យមានភ្លាំងភ្លាត់ ក្នុងកម្មវិធីធំ ដែលមានលោក គីម ជុងអ៊ុន ជាអធិបតី។
ក្នុងអាយុ៣៣ឆ្នាំ គីម ជុងអ៊ុន ប្រមុខដឹកនាំកូរ៉េខាងជើង ទំនងជានឹងត្រូវ ប្រកាសចាត់ទុកកូរ៉េខាងជើងជាមហាអំណាចនុយក្លេអ៊ែរ និងប្រកាសយកមាគ៌ានយោបាយពង្រឹងការអភិវឌ្ឍន៍សេដ្ឋកិច្ចនិងនុយក្លេអ៊ែរ នាឱកាសឡើងថ្លែងសុន្ទរកថា បើកមហាសន្និបាតជាផ្លូវការផង៕
ប្រភព៖ RFI
កូរ៉េខាងជើងត្រៀមរូចស្រេចនឹងបើកមហាសន្និបាតបក្សជាលើកទី១
![កូរ៉េខាងជើងត្រៀមរូចស្រេចនឹងបើកមហាសន្និបាតបក្សជាលើកទី១]()
Reviewed by Unknown
on
May 06, 2016
Rating:
No comments: