សុបិនគ្រងតំណែងជើងឯកប្រឺមីញេលីករបស់ក្លិបកញ្ជ្រោង Leicester ក្លាយជាការពិត

សំឡេងហ៊ោកញ្ជ្រៀវចេញពីអ្នកគាំទ្រក្លិបកញ្ជ្រោងបានផ្ទុះឡើងនៅ កណ្តាលទីក្រុង Leicester ចក្រភពអង់គ្លេស ខណៈដែលការប្រកួតរវាងក្លិបTottenham និង Chelsea ត្រូវបានបញ្ចប់ក្នុងលទ្ធផលស្មើគ្នា២-២ ។
ក្តីសុបិនរបស់ក្លិបកញ្ជ្រោង Leicester គ្រងជើងឯកប្រឺមីញេលីករដូវកាល២០១៥-២០១៦ បានក្លាយជាការពិត ខណៈក្លិបមាន់ខ្នាយមាសTottenhamដែលជាគូប្រជែងរបស់ខ្លួនតែមួយគត់ មិនទទួលបានលទ្ធផលល្អក្នុងការប្រកួតជាមួយក្លិបតោខៀវ Chelsea កាលពីរាត្រីថ្ងៃចន្ទកន្លងទៅ ។ កញ្ជ្រោង Leicester មាន៧៧ពិន្ទុនាំមុខក្លិបដទៃទៀតដែលអាចឲ្យក្លិបនេះគ្រងតំណែង ជើងឯកបានហើយទោះបីនៅសល់២ប្រកួតចុងក្រោយទៀតក៏ដោយ ។
ក្តីស្រមៃដណ្តើមជើងឯករបស់ក្លិបមាន់ខ្នាយមាស Tottenham ត្រូវរលាយខ្សុល ខណៈក្លិបតោខៀវ Chelsea តាមរកគ្រាប់បាល់ស្មើនៅតង់ទី២ ដោយកីឡាករ Gary Cahill នៅនាទីទី ៥៨ និងកីឡាករ Eden Hazard នៅនាទីទី៨៣។ ដូច្នេះទោះបីជា Tottenham អាចយកឈ្នះទាំង២ប្រកួតដែលនៅសល់ក្តី ក៏លំដាប់ពិន្ទុរបស់ខ្លួនដែលបច្ចុប្បន្នមាន៧០ពិន្ទុ មិនអាចតាមទាន់ក្លិបកញ្ជ្រោង Leicester បានដែរព្រោះបច្ចុប្បន្នក្លិបកញ្ជ្រោងមួយនេះមាន៧៧ពិន្ទុ ។
ទោះបីយ៉ាងណាក្រោយចប់ការប្រកួត គ្រូបង្វឹកក្លិប Tottenham លោក Mauricio Pochettino បាននិយាយថា៖«ខ្ញុំសូមចូលរួមអបអរសាទរចំពោះក្លិប Leicester និងគ្រូបង្វឹកលោក Ranieri ។ ២០១៥-២០១៦ ជារដូវកាលដ៏អស្ចារ្យមួយក្នុងក្របខ័ណ្ឌប្រឺមីញេលីក។
គ្រូបង្វឹកក្លិប Leicester លោក Claudio Ranieri បាននិយាយនៅលើគេហទំព័ររបស់ក្លិបថា រូបលោកពិតជាមានមោទនភាពណាស់ សម្រាប់ក្រុមរបស់លោក ក៏ដូចជាបុគ្គលិកទូទៅក្នុងក្លិប ព្រមទាំងអ្នកគាំទ្រក្លិបទាំងអស់ ព្រោះនេះជាលើកដំបូងរបស់ក្លិបដែលបានគ្រងតំណែងជាម្ចាស់ជើងឯក ប្រឺមីញេលីកក្នុងប្រវត្តិសាស្ត្រ ចាប់តាំងពីឆ្នាំ១៨៨៤ មក ៕