អ្នកបើករថយន្តលឿនដូចហោះ បុកគេស្លាប់ គេចខ្លួនបាត់ស្រមោល

ខេត្តសៀមរាប ៖ អ្នកបើករថយន្តបើកក្នុងល្បឿនលឿនដូចហោះ ខណៈដល់ផ្លូវកោងមិនបានប្រុងប្រយ័ត្ន ក៏ជ្រុលទៅបុករះម៉ូតូចំនួន០២គ្រឿង ដែលបានបើកបញ្ច្រាស់ទិសគ្នា បណ្ដាលឱ្យម្នាក់ស្លាប់ នៅហ្នឹងកន្លែងកើតហេតុ ហើយនិងម្នាក់ទៀតរងរបួសធ្ងន់ ត្រូវបានដឹកយកទៅជួយសង្គ្រោះនៅមន្ទីរពេទ្យខេត្តសៀមរាប ។

ហេតុការគ្រោះថ្នាក់ខាងលើនេះកើតឡើងនៅវេលាម៉ោង៤ល្ងាចថ្ងៃទី១៤ ខែតុលា ឆ្នាំ២០១៦ ស្ថិតនៅលើកំណត់ផ្លូវជាតិលេខ៦៧ចាស់ ក្នុងភូមិបន្ទាយស្រី ឃុំខ្នារសណ្ដាយ ស្រុកបន្ទាយស្រី ខេត្តសៀមរាប នៅខាងត្បូងអធិការដ្ឋាននគរបាលស្រុកបន្ទាយស្រីចម្ងាយប្រហែល៣០០ម៉ែត្រ ។

លោកអនុសេនីយ៍ឯក ជៀម រក្សា អធិការនគរបាលស្តីទីស្រុកបន្ទាយស្រី បានឱ្យដឹងនៅរសៀលថ្ងៃទី១៥ ខែតុលា ឆ្នាំ២០១៦ នេះថា មានសេចក្តីរាយការមកថា មានករណីគ្រោះថ្នាក់មួយកើតឡើងនៅចំណុចដូចខាងលើ បណ្ដាលឱ្យបុរសម្នាក់ស្លាប់ និងម្នាក់ទៀតរងរបួសធ្ងន់ ដោយសារផ្លូវនោះវាស្ងាត់ផងនោះ ទើបរថយន្តនោះអាចរត់គេចខ្លួនបាន ។

លោកអធិការនគរបាលស្តីទីបន្តថា ក្រោយពីទទួលបានព័ត៌មានភ្លាម លោកបានឱ្យកម្លាំងជំនាញ ចុះទៅដល់កន្លែងកើតហេតុ រួចធ្វើការវាស់វែង ដើម្បីយកម៉ូតូចេញ កុំឱ្យស្ទះចរាចរ ប៉ុន្តែពេលចុះទៅដល់មិនបានឃើញរថយន្តនៅកន្លែងកើតហេតុនោះទេ ឃើញតែជនរងគ្រោះមាន២នាក់ ម្នាក់ស្លាប់នៅហ្នឹងកន្លែង និងម្នាក់ទៀតរងរបួសធ្ងន់ត្រូវបានរថយន្តដឹកយកទៅសង្គ្រោះនៅមន្ទីរពេទ្យខេត្ត។

លោកបានបញ្ជាក់បន្ថែមថា ជនរងគ្រោះទាំង២នាក់មានឈ្មោះ សាន ណាគ្រី ភេទប្រុស អាយុ៦១ឆ្នាំ រស់នៅភូមិស្រះឈូក ឃុំត្រពាំងត្រី ស្រុកអន្លង់វែង ខេត្តឧត្តរមានជ័យ (ស្លាប់) និងម្នាក់ទៀតជាមន្ត្រីអជ្ញាធរអប្សារា មិនស្គាល់អត្តសញ្ញាណ (រងរបួសធ្ងន់) ករណីគ្រោះថ្នាក់ចរាចរនេះ គឺបណ្តាលមកពីរថយន្តបើកបរក្នុងស្ថានភាព ល្បឿនលឿន ដល់ផ្លូវកោង ហៅ(អន្ទង់អាំង រៀងជាអក្សរ N) បណ្ដាលឱ្យជ្រុលចង្កូតទៅបុករះម៉ូតូជនរងគ្រោះ ដែលជិះបញ្ជ្រាស់ទិសគ្នា ទាំង២នាក់ បណ្ដាលឱ្យម្នាក់ស្លាប់នៅហ្នឹងកន្លែង និងម្នាក់ទៀតរងរបួសធ្ងន់ រួចដឹកបញ្ជូនទៅសង្គ្រោះនៅមន្ទីរពេទ្យបង្អែកខេត្ត បន្ទាប់ពីកើតហេតុភ្លាមៗ ខណៈពេលនោះម្ចាស់រថយន្ត ឃើញសភាពការមិនស្រួល ក៏បានបើករត់គេចខ្លួនបាត់ដោយសុវត្ថិភាព ។

បច្ចុប្បន្នសាកសពជនរងគ្រោះ ត្រូវបានកម្លាំងសមត្ថកិច្ច ជំនាញបានស្រាវជ្រាវរកក្រុមគ្រួសារឃើញហើយនៅខេត្តឧត្តរមានជ័យ ហើយពួកគាត់កំពុងធ្វើដំណើរមកទទួលយកសាកសពទៅធ្វើបុណ្យតាមប្រពៃណី ។ រីឯម៉ូតូរបស់ជនរងគ្រោះទាំង០២គ្រឿង ត្រូវបានយកមករក្សាទុកនៅអធិការដ្ឋាននគរបាលស្រុកបន្ទាយស្រី ។ ចំពោះរថយន្តបង្កកម្លាំងនគរបាលស្រុកបន្ទាយស្រីកំពុងធ្វើការស្រាវជ្រាវ និងចាប់យកមកផ្តន្ទាទោសតាមផ្លូវច្បាប់ ៕