សិស្សឆ្នើមផ្នែកតស៊ូមតិប្រាប់ពីគន្លឹះនៃភាពជោគជ័យរបស់ខ្លួន
ភ្នំពេញ៖ អ្នកតស៊ូមតិត្រូវមានចំណេះដឹងជាតិ-អន្តរជាតិទូលាយ ចេះភាសាបរទេស គិតរហ័សរហួន និងសហការគ្នាដោយទំនុកចិត្ត ដើម្បីតស៊ូមតិការពារអំណះអំណាងពួកគេច្បាស់លាស់។ ទាំងនេះ ជាយុទ្ធសាស្ត្ររបស់ក្រុមតស៊ូមតិដែលដណ្តើមបានពានរង្វាន់ពីរស្ទួន គឺ Best Debating Skill និង Best Keywords ពីវេទិកាសភាយុវជពាណិជ្ជករអន្តរជាតិ (JCI) កម្ពុជា។
យុវសិស្សចំនួន ៣រូប មកពីក្លឹបតស៊ូមតិវិទ្យាស្ថានអន្តរទ្វីបអាមេរិកាំង (AII) បានដណ្តើមជ័យលាភីពីរស្ទួន ផ្នែកតស៊ូមតិដ៏ឆ្នើម ក្នុងវេទិកាប្រកួតប្រជែងពានរង្វាន់ វោហាសព្ទជាសាធារណៈ និងអ្នកតស៊ូមតិដ៏ឆ្នើមប្រចាំឆ្នាំ ២០១៦។ ការប្រកួតប្រជែងពានរង្វាន់នេះ ជាវេទិកាដែលបំផុសគំនិតយុវជនឲ្យហ៊ានបញ្ចេញមតិយោបល់ រកដំណោះស្រាយអភិវឌ្ឍពួកគេ និងប្រទេសប្រកបដោយនិរន្តរភាព។
ពួកគេរំភើបឥតឧបមា នៅពេលអ្នករៀបចំកម្មវិធីប្រកាសលទ្ធផលប្រកួតតស៊ូមតិ ចំពោះមុខអ្នកចូលរួមទស្សនារាប់ពាន់នាក់ ក្នុងវេទិការបស់សភាយុវជពាណិជ្ជករអន្តរជាតិ (JCI) កម្ពុជា កាលថ្ងៃទី២៤ ខែមេសា ឆ្នាំ២០១៦ កន្លងទៅ នាសាលាតិចណូ ។
កញ្ញា អ៊ូច ម៉ី ជាសិស្សថ្នាក់ទី១១«ខ» នៃសាលាអន្តរទ្វីបអាមេរិកាំង (AIS) កំពុងឈររង់ចាំស្តាប់លទ្ធផលស្ទើរលោតផុតពីកម្រាលឥដ្ឋ នៅពេលនាងបានស្តាប់លឺការប្រកាសលទ្ធផលប្រកួតល្អប្រសើរ។ ក្រោយពីក្រុមពួកគេបានប្រកួតប្រជែងជម្រុះជាមួយសិស្សនិស្សិតចំនួន ៦ក្រុម មកពីសាលាដទៃ អស់រយៈពេលពេញមួយថ្ងៃ យុវតីវ័យ ១៨ឆ្នាំ ហាក់ស្ទើរស្រក់ទឹកភ្នែក នៅពេលក្រុមពួកគេអាចដណ្តើមបានពានរង្វាន់ពីរស្ទួនពីកម្មវិធីតស៊ូមតិ JCI។
កូនស្រីច្បងក្នុងគ្រួសារត្រកូលអាជីវករនៅរាជធានីភ្នំពេញ និយាយថា នាងទទួលបានការបណ្តុះបណ្តាលរបៀបតស៊ូមតិពីលោកគ្រូនៅសាលា AIS អស់ជាង ១០ឆ្នាំហើយ នាងក៏ចង់ តស៊ូមតិដែរ ព្រោះការតស៊ូមតិ នាំឲ្យនាងមានសមត្ថភាពស្រាវជ្រាវ និងអភិវឌ្ឍសមត្ថភាព បញ្ចេញមតិច្បាស់លាស់។ យុវតីមាឌស្តើងសម្បុរសណ្តែកបាយ រូបនេះនិយាយទាំងទឹកមុខរីករាយយ៉ាងដូច្នេះថា៖«លោកគ្រូជួយហ្វឹកហាត់ ពួកខ្ញុំច្រើនខែដែរ។ ដំបូង ខ្ញុំអត់សូវពូកែនិយាយអង់គ្លេសទេ ហើយនិយាយទៅខ្ញុំអន់ស្ទើរតែទាំងអស់ ប៉ុន្តែគាត់បានហ្វឹកហាត់ខ្ញុំឲ្យក្លាយជាមនុស្សម្នាក់ដែលពូកែ និយាយអង់គ្លេសហើយ ខ្ញុំបានកែប្រែច្រើនណាស់គឺ គាត់បង្រៀនខ្ញុំពីបញ្ហាផ្សេងៗ ក្នុងសង្គម អានសៀវភៅឲ្យបានច្រើន មើលព័ត៌មានឲ្យបានច្រើន ដើម្បីឲ្យដឹងថា បញ្ហាអ្វីខ្លះដែលទាក់ទងនឹងសង្គមយើងសព្វថ្ងៃ»។ ជាងនេះទៀត យុវតីដែលចង់ចេះចង់ដឹងពីការតស៊ូមតិបន្តថា គ្រូបណ្តុះបណ្តាលបានជំរុញនាងឲ្យមានភាពក្លាហាន និងចេះរួមសាមគ្គីភាពជាមួយមិត្តភក្តិរួមក្រុម។ កញ្ញាលើកពីសកម្មភាពបណ្តុះបណ្តាលជាក់ស្តែងឡើងថា៖«គាត់ឲ្យពួក ខ្ញុំឱបគ្នា លើកទឹកចិត្តគ្នា ឲ្យពួកខ្ញុំ ជួយមើលថែគ្នា និងកែលម្អចំណុចខ្វះខាតអ្វីខ្លះ»? យុវនារី អ៊ូច ម៉ី ប្តេជ្ញាថា នាងនឹងបន្តសិក្សាតស៊ូមតិពង្រឹងសមត្ថភាពបន្ថែម ដើម្បីឈានទៅយកពានរង្វាន់បន្ថែមទៀត នៅឆ្នាំក្រោយ។
«ការតស៊ូមតិ គឺល្អមែនទែន ព្រោះទោះបីជាបញ្ហាអ្វីមួយក៏ដោយក្នុងសង្គម គឺវាមានល្អ និងអាក្រក់ ដូចនេះវាល្អ ឬអាក្រក់ គឺអាស្រ័យលើអ្វីដែលយើងនិយាយ ស ឬក៏ខ្មៅ អាស្រ័យ លើយើងនិយាយ ដូចនេះការតស៊ូមតិ ទោះបីជាយើងនៅខាងណាក៏ដោយ យើងត្រូវតែធ្វើ ម៉េចឲ្យគេជឿលើយោបល់របស់យើង មតិយើងដែលយើងប្រាប់គេ»។ យុវតីវ័យ ១៨ឆ្នាំ លើកទស្សនតស៊ូមតិ។
មិនខុសគ្នាប៉ុន្មានដែរ កញ្ញា ហៃ ស៊ាងម៉ី អាយុ ១៨ឆ្នាំ ជាសមាជិកក្លឹបតស៊ូមតិនៃវិទ្យាស្ថានអន្តរទ្វីបអាមេរិកាំង និយាយថា ការតស៊ូមតិផ្តល់សារៈសំខាន់ដល់ការអភិវឌ្ឍយុវជន និងសង្គម ព្រោះវាជួយពួកគេឲ្យចេះជជែកពិភាក្សាវែកញែកហេតុផល នៃបញ្ហា។
យុវនារីសម្បុរសររូបនេះ និយាយពីបទពិសោធន៍តស៊ូមតិថា នាងត្រូវស្រាវជ្រាវឯកសារពាក់ព័ន្ធនានា ទាំងជាតិ និងអន្តរជាតិ តាមរយៈសៀវភៅ និងប្រព័ន្ធអនឡាញ ដើម្បីបង្កើនចំណេះដឹងឲ្យទូលាយ មុនពេលឡើងលើវេទិកាប្រកួត។ ទោះបីជា នាងបានត្រៀមខ្លួនរួចក្តី នាងនៅតែមានអារម្មណ៍ភ័យអរ នៅពេលនាងឡើងប្រកួត ព្រោះនាងពុំដឹងថា តើភាគីម្ខាងទៀត នឹងបញ្ចេញគំនិតអ្វីខ្លះ ដើម្បីប្រកួតប្រជែងជាមួយក្រុមនាង?
កញ្ញានិយាយថា៖«ពេលនៅលើវេទិកា ខ្ញុំមានអារម្មណ៍ភ័យផង រំភើបផង ពីព្រោះថា ពេលដែលយើងស្តាប់ឃើញចំណុចគេហើយ យើងគិតថា យើងមានគំនិតល្អជាងគេ យើងចង់បញ្ចេញគំនិតដល់គេស្តាប់ យើងចង់ប្រជែងសមត្ថភាពគំនិតគេ»។
យ៉ាងណា នារីរូបនេះ តែងតែជឿជាក់លើសមត្ថភាពតស៊ូមតិនាង ព្រោះនាងបានស្រាវជ្រាវ ឯកសារពាក់ព័ន្ធជាច្រើន តាមការណែនាំរបស់គ្រូបង្វឹក។ កញ្ញា ហៃ ស៊ាងម៉ី ជឿជាក់ថា យុវជនពិតជាអភិវឌ្ឍគំនិតពួកគេ តាមរយៈការតស៊ូមតិ ព្រោះពួកគេត្រូវចេះស្រាវជ្រាវឯកសារ នានា មុនពេលគេបញ្ចេញគំនិត និងហេតុផលសមរម្យជាក់លាក់មួយ។
ដោយឡែក កញ្ញា ស៊ីវ សុភា អាយុ ១៨ឆ្នាំ ជាសិស្សភាសាអង់គ្លេសនៃវិទ្យាស្ថានអន្តរទ្វីបអាមេរិកាំង ចាត់ទុកថា ការតស៊ូមតិ ជាការអភិវឌ្ឍគំនិត ព្រោះពួកគេអាចបញ្ចេញគំនិតថ្មី ប្រកបដោយទំនុកចិត្ត ក្នុងវេទិកា នៅចំពោះមុខអ្នកទស្សនារាប់ពាន់នាក់។
ក្រៅពីការសិក្សាស្រាវជ្រាវ យុវតីសម្បុរសរ រូបនេះ បានព្យាយាមពង្រឹងសមត្ថភាពតស៊ូមតិតាមរយៈការណែនាំរបស់លោកគ្រូបង្វឹក នាងឲ្យបញ្ចេញគំនិត ដោយផ្អែកតាមទិន្នន័យផ្លូវការ ដើម្បីឲ្យការតស៊ូមតិច្បាស់លាស់។ នាងនិយាយយ៉ាងដូច្នេះថា៖«ពេលណា យើងស្គាល់ខ្លួនឯងច្បាស់ ពេលណាយើងយល់ពីអ្វីដែលយើងត្រូវនិយាយបានច្រើន ពេលណាដែលយើងគិតថា អ្វីដែលយើងនិយាយហ្នឹង វាមានន័យ វាមិនមែនមានន័យថា យើងនិយាយឲ្យឈ្នះគូប្រកួតយើងទេ ប៉ុន្តែយើងនិយាយ ដើម្បីដោះស្រាយបញ្ហា ឬសិក្សាលើប្រធានបទអ្វីមួយ»។ នាងបន្តថា៖«វាជួយឲ្យយើងមាន មោទនភាពលើសមត្ថភាពយើង ដូចនេះយើងនឹងមានទំនុកកាន់តែខ្លាំងលើខ្លួនយើងហើយ ការងារអ្វីក៏ជោគជ័យ»។ លោកស្រី កៅ ស៊ីនួន អាយុ ៤២ឆ្នាំ ជាម្តាយរបស់យុវតី អ៊ូច ម៉ី មានអារម្មណ៍រំភើបជាខ្លាំង នៅពេលកូនស្រីលោកស្រីដណ្តើមពានរង្វាន់តស៊ូមតិឆ្នើមពីរស្ទួន ព្រោះលោកស្រីមើលឃើញ ថា កូនស្រីមានសមត្ថភាពតស៊ូមតិល្អ។
អាជីវករនៅរាជធានីភ្នំពេញ រូបនេះ បានថ្លែងអំណរគុណដល់លោកគ្រូ អ្នកគ្រូដែលបានជួយ បណ្តុះបណ្តាលកូនស្រីលោកស្រីឲ្យមានសមត្ថភាពបញ្ចេញគំនិតប្រកួតឈ្នះ ក្រុមដទៃ។
ទន្ទឹមគ្នា លោកស្រីនិយាយថា លោកស្រីនឹងផ្តល់អំណោយឲ្យកូនស្រី ផងដែរ ដើម្បីលើកទឹក ចិត្តកូនស្រីលោកស្រីបន្ថែមទៀត។
ប្រភព៖ ថ្មីៗ
សិស្សឆ្នើមផ្នែកតស៊ូមតិប្រាប់ពីគន្លឹះនៃភាពជោគជ័យរបស់ខ្លួន
![សិស្សឆ្នើមផ្នែកតស៊ូមតិប្រាប់ពីគន្លឹះនៃភាពជោគជ័យរបស់ខ្លួន]()
Reviewed by Unknown
on
May 04, 2016
Rating:
No comments: