Samsung គ្រោង​ផលិត​បន្ទះ​ឈីប Snapdragon 830 ថ្មី​បំផុត​ បំពាក់​លើ​​កំពូល​ទូរស័ព្ទ Galaxy S ឆ្នាំ​២០១៧

(សេអ៊ូល)៖ គេហទំព័របច្ចេកវិទ្យា Electronic Times របស់ប្រទេសកូរ៉េខាងត្បូង បានរាយការណ៍ នៅថ្ងៃពុធនេះថា ក្រុមហ៊ុនយក្ស Samsung Electronics Co Ltd នឹងក្លាយជាអ្នកផលិតផ្តាច់មុខ នូវបន្ទះឈីបជំនាន់ថ្មី Qualcomm Snapdragon ដែលមាន​ល្បឿនលឿន។ នេះបើតាមការចេញផ្សាយ នៅមុននេះបន្តិច ដោយសារព័ត៌មាន Channel News Asia នាព្រឹកថ្ងៃពុធ ទី០៥ ខែតុលា ឆ្នាំ២០១៦។
ប្រភពដដែលបានឲ្យដឹងទៀតថា ក្រុមហ៊ុនបច្ចេកវិទ្យា​ដ៏ធំមួយនេះ នឹងផលិតបន្ទះឈីប Snapdragon 830 របស់ក្រុមហ៊ុនបរិក្ខារ​ទូរគមនាគមន៍ Qualcomm ដែលនឹងមានការ​ផលិតឲ្យមាន ទំហំតូចបំផុត ត្រឹមតែ ១០ណាណូម៉ែត្រ។ មួយវិញទៀត ក្រុមហ៊ុនកូរ៉េខាងត្បូងមួយនេះ បានព្រមព្រៀងក្នុងបំពាក់ ប្រភេទបន្ទះឈីបថ្មីនេះ នៅលើទូស័ព្ទ​ដៃស្មាតហ្វូនម៉ូដែល Galaxy S ដែលនឹងត្រូវចេញលក់នៅ ឆ្នាំ២០១៧ខាងមុខ។
គួរបញ្ជាក់ដែរថា កាលពីខែមករា ដើមឆ្នាំនេះ ក្រុមហ៊ុន Samsung បានធ្វើអះអាងថា ខ្លួនគឺជាអ្នកផលិតផ្តាច់មុខ​តែមួយគត់ នៃបន្ទះឈីប Snapdragon 820 ដែលជាបន្ទះឈីប​ជំនាន់មុន ហើយការចំណាយក្នុងការផលិត​នៅពេលនោះ ត្រូវបានអ្នកវិភាគមួយ​ចំនួនជឿថា មានតម្លៃច្រើនជាង ១ពាន់លានដុល្លារអាមេរិក។ ជាមួយគ្នានេះដែរ ក្រុមហ៊ុន Samsung និង Qualcomm មិនទាន់អាច ទាក់ទងបានទេ ដើម្បីធ្វើការអធិប្បាយ ទៅលើសេចក្តីរាយការណ៍នេះ៕

 

ប្រភព៖ KhmerTalking