វិជ្ជាមេផ្ទះ៖ មាន់បុកអង្ក្រង

គ្រាន់តែលឺឈ្មោះ​អាហារ​មួយមុខ​នេះ​ប្រិយមិត្ត​ច្បាស់ជា​ប្លែកអារម្មណ៍​ជាមិនខាន ព្រោះមិន​សូវ​មាន​អ្នក​ស្គាល់​ហើយ​ធ្វើញ៉ាំ​នោះទេ។ ប៉ុន្តែ​ថ្ងៃនេះ​ប្រិយមិត្ត​អាច​សាកល្បង​ជាមួយនឹង​ខ្មែរប្រពៃ​ទាំង​អស់គ្នា។
+ គ្រឿងផ្សំ៖

• - ​សាច់មាន់ ៤០០ក្រាម ចៀន ឬអាំងឱ្យឆ្អិន​ហាន់តូច​ល្មម (ប្រឡាក់​អំបិល​ជាមួយ​ប៊ីចេងបន្តិចៗ)
• - ​អង្ក្រងលីង​ឆ្អិន​ កន្លះចាន
• - ប្រហុក​អាំងឆ្អិន កន្លះស្លាបព្រាបាយ
• - ទឹក​ក្រូច​ឆ្មា ១ស្លាបព្រាកាហ្វេ
• - ទឹកត្រី កន្លះស្លាបព្រាបាយ
• - អំបិល បន្តិច
• - ស្ករស ២ស្លាបព្រាកាហ្វេ
• - ប៊ីចេង ចុងស្លាបព្រាកាហ្វេ
• - ខ្ទឹមក្រហម ១ដុំ
• - ខ្ទឹមស ៣កំពឹស
• - ត្រសក់, ជីស្លឹកវែង, ដើមចេក មួយមុខ​បន្តិចធ្វើ​ជាអន្លក់
• - ម្ទេសហាន់ ដាក់តាម​ការចូល​ចិត្ត(ដាក់ពេលញ៉ាំ ឬបុកចូល​ក៏បាន)

+ វិធីធ្វើ៖
១. មុន​ដំបូង​យក​អង្ក្រង​លីង​រួច​ហើយ​មក​បុក​ជា​មួយ​ប្រហុក​អាំង​ឆ្អិន​ ពេល​បុក​រួច​រាល់​ដួស​ទុក​ដោយ​ឡែក​សិន។
២. យក​ខ្ទឹមស និង​ខ្ទឹម​ក្រហម​មក​​ដាក់​បុកឱ្យម៉ត់​ បន្ទាប់​មក​ដាក់​អង្ក្រង​ដែល​បុក​ជា​មួយ​ប្រហុក​រួច​ដាក់​ចូល​បុក​មួយ​ភ្លេត​ទៀត​។
៣. ដាក់​គ្រឿង​ចូល​មាន ទឹក​ត្រី, អំបិល, ស្ករស, ប៊ីចេង, ទឹកក្រូចឆ្មា និងសាច់​មាន់បុក​ចូល​គ្នា​ទាំង​អស់​ឱ្យចូល​រស់​ជាតិ​​អាច​យក​វា​មក​ញ៉ាំ​ផ្ទាប់​ជា​មួយ​អន្លក់​បាន​ហើយ៕