ម្ចាស់ផ្ទះរវល់ទៅមើលពិធីប្រណាំងទូកនៅក្រុងបាត់ដំបង ភ្លើងឆេះផ្ទះហ្មត់

ខេត្តបាត់ដំបង ៖ អគ្គិភ័យដែលគេសង្ស័យថា បណ្ដាលមកពីការទុស្សេចរន្តអគ្គិសនី ឬដោយសារភ្លើងទៀន-ធូប បានឆេះផ្ទះអស់ចំនួន៣ល្វែង កាលពីវេលាម៉ោង៩និង១០នាទីយប់ថ្ងៃទី១៦តុលា នៅភូមិបវេល១ ឃុំបវេល ស្រុកបវេល ខណៈម្ចាស់ផ្ទះរវល់នាំគ្នាទៅមើលពិធីប្រណាំងទូកនៅក្រុងបាត់ដំបង ។
មន្ត្រីនគរបាលស្រុកបវេលឲ្យដឹងថា អគ្គិភ័យនោះបានផ្ដើមចេញពីផ្ទះលក់គ្រឿងទេសនិងលក់ថ្នាំពេទ្យរបស់ឈ្មោះ អ៊ួច សារ៉េត ហៅគ្រូរ៉េត អាយុ៤៧ឆ្នាំ រហូតឆេះរាលដាលដល់ផ្ទះអ្នកនៅក្បែរខាង ។ មន្ត្រីដដែលបន្តថា ផ្ទះលោកគ្រូរ៉េត មាន២ល្វែងរាប់ទាំងផ្ទះកូនរបស់គាត់ផង ដែលធ្វើអំពីឈើប្រក់ស័ង្កសី និងមានមុខរបរលក់គ្រឿងទេសនិងថ្នាំពេទ្យ ។ អគ្គិភ័យបានចាប់ផ្ដើមឡើងនៅចំកណ្ដាលផ្ទះរបស់គាត់ ដែលគេសង្ស័យថា អាចបណ្ដាលមកពីការទុស្សេខ្សែភ្លើង ឬភ្លើងទៀន-ធូបដែលគាត់ដុតទុកចោល ព្រោះថ្ងៃនោះជាថ្ងៃសីល តែម្ចាស់ផ្ទះបានបិទទ្វារទុកចោលរួចនាំគ្នាទៅមើលការប្រណាំងទូកនៅក្រុងបាត់ដំបង លុះដឹងថា មានអគ្គិភ័យកើតឡើងទើបនាំគ្នាត្រឡប់មកផ្ទះវិញទាំងយប់ ។
សាក្សីនានាបាននិយាយថា ដំបូងគេឃើញអណ្ដាតភ្លើងបានចាប់ផ្ដើមពីចំណុចកណ្ដាលនៃផ្ទះជនរងគ្រោះ ហើយបានឆេះរាលដាលភ្លាមៗតែម្ដង ។ អ្នកភូមិបានព្យាយាមជួយជះទឹកពន្លត់ភ្លាមៗដែរ ខណៈម្ចាស់ផ្ទះកំពុងសប្បាយក្នុងពិធីប្រណាំងទូកនៅក្នុងក្រុងបាត់ដំបងប៉ុន្តែមិនអាចបន្ថយឥទ្ធិពលភ្លើងបានឡើយ ។ លុះរថយន្តពន្លត់អគ្គិភ័យរបស់សមត្ថកិច្ចមកដល់ទើបគ្រប់គ្រងបាន តែអគ្គិភ័យបានលេបត្របាក់ផ្ទះ២ខ្នងទាំងស្រុងទៅហើយ រីឯ១ខ្នងទៀតឆេះអស់ជញ្ជាំងមួយចំហៀង ។
លោក សូរ សិន នាយផ្នែកបង្ការ និងពន្លត់អគ្គិភ័យ នៃអធិការដ្ឋាននគរបាលស្រុកបវេលបានប្រាប់តាមទូរស័ព្ទថា ផ្ទះ២ល្វែងរបស់ឈ្មោះអ៊ួច សារ៉េត ហៅគ្រូរ៉េត ដែលមានលក់គ្រឿងទេស និងថ្នាំពេទ្យ ត្រូវអគ្គិភ័យឆេះអស់ទាំងស្រុងទាំងផ្ទះទាំងអីវ៉ាន់ រីឯ១ល្វែងទៀតឆេះអស់ជញ្ជាំងមួយចំហៀង ។ លោក សូរ សិន បន្តថា គេមិនទាន់ដឹងអំពីមូលហេតុជាក់លាក់ ដែលនាំឲ្យមានអគ្គិភ័យកើតឡើងនៅឡើយទេ ។ ប៉ុន្តែម្ចាស់ផ្ទះអះអាងថា អាចបណ្ដាលមកពីការទុស្សេចរន្តអគ្គិសនី រីឯអ្នកភូមិខ្លះសន្និដ្ឋានថា អាចបណ្ដាលមកពីភ្លើងធូប ឬទៀន ដែលម្ចាស់ផ្ទះដុតទុកចោល មុនពេលនាំគ្នាចេញទៅមើលពិធីប្រណាំងទូកនៅក្រុងបាត់ដំបង ។
ទោះជាបែបណា គេនៅមិនទាន់ដឹងអំពីទំហំនៃការខាតបង់ទឹកប្រាក់នៅឡើយទេ ព្រោះមន្ត្រីជំនាញកំពុងសួរនាំម្ចាស់ផ្ទះ និងកំពុងធ្វើការស្រាវជ្រាវអំពីមូលហេតុដែលនាំឲ្យមានអគ្គិភ័យនេះកើតឡើង ។ សមត្ថកិច្ច និងមតិនានាបានលើកឡើងថា ម្ចាស់ផ្ទះបង្កហេតុអាចប្រឈមនឹងការបង់ថ្លៃសំណងដល់ម្ចាស់ផ្ទះដែលរងការខូចខាតនៅក្បែរនោះ ប្រសិនបើរកឃើញថា ផ្ទះផ្ដើមហេតុនោះ បង្កឡើងដោយសារឥទ្ធិពលភ្លើងធូប ឬភ្លើងទៀនដែលម្ចាស់ផ្ទះដុតទុកចោល តែមន្ត្រីជំនាញកំពុងធ្វើការស្រាវជ្រាវលើករណីនេះហើយ ៕