នាយក្រិនមិនទាន់ការប្រពន្ធទី ២ យកលុយបើកហាងគ្រឿងក្លែម
ភ្នំពេញៈ តារាកំប្លែងមាឌល្អិតតែចិត្ដធំ នាយក្រិន មិនត្រឹមតែសំណាងល្អមានប្រពន្ធទី ២ អាចរួមរស់ជាមួយនឹងគ្នាមិនទាន់រៀបការរហូតដល់មានបុត្រា១ និងបុត្រី១ ប៉ុណ្ណោះទេ ស្រាប់តែថ្មីៗនេះ គេឃើញតារាកំប្លែងខ្លួនតូចពូកែវោហារក្នុងពិភពសិល្បៈកំប្លែងក៏រំលេចចេញនូវយីហោបើកហាងលក់គ្រឿងក្លែមមួយកន្លែងឈ្មោះថា «ជួបគ្នានៅហាងនាយក្រិន» គួរឲ្យកោតសរសើរ និងភ្ញាក់ផ្អើលពីមហាជនតែម្តង មានទីតាំងនៅលើវិថីលេខ ២០០៤ ។
តារាកំប្លែងមានឈ្មោះដើមទេស សុជន ហៅ នាយ ក្រិន បង្ហើបប្រាប់ ភ្នំពេញ ប៉ុស្តិ៍ ឲ្យដឹងថា៖ «គ្រាន់តែជាហាងតូចតាចមួយទេ ដោយខ្ញុំមានបំណងចង់បើកដើម្បីទុកទៅឲ្យប្រពន្ធខ្ញុំ [ប្រពន្ធទី២ ឈ្មោះយ៉ាយ៉ា] មានការងាររកស៊ីផ្ទាល់ និងអាចជួយរកនូវប្រាក់បន្ថែមសម្រាប់ចិញ្ចឹមកូន ហើយខ្ញុំក៏នៅចាំជួយមើលផងដែរ»។
នាយក្រិនបន្តថា៖ «ហាងនេះយើងមានតុរៀបចំទទួលភ្ញៀវបានត្រឹមតែប្រមាណ ១០ តុប៉ុណ្ណោះ។ ជាហាងប្រភេទ BBQ និងគ្រឿងក្លែម។ នៅពេលថ្ងៃត្រង់យើងក៏មានរៀបចំម្ហូបបែបកម្ម៉ង់ភ្លាមៗដែរ។ ចំណែកតម្លៃវិញសមរម្យដូចគេដូចឯង ហើយចាប់ផ្តើមដំណើរការលក់តាំងពីថ្ងៃសុក្រទី ១៤ ខែតុលា ដែលមានបម្រើមុខម្ហូបប្រភេទជាគ្រឿងក្លែមគ្រប់មុខ ស៊ុបពពែ និងភេសជ្ជៈគ្រប់យ៉ាងដល់អតិថិជន»។
ទោះបីតារាកំប្លែងដែលមានមាឌល្អិត និងមានវ័យ ៣៧ ឆ្នាំ រូបនេះ មិនចង់បង្ហើបពីទឹកប្រាក់ដាក់ទុនអស់ប៉ុន្មានក្តី តែលោកបន្តឲ្យដឹងដែរថា៖ «មិនដឹងយ៉ាងណាយ៉ាងណីទេ សម្រាប់ការរកស៊ីលើកដំបូងនេះ ព្រោះយើងជួលដីគេដើម្បីរៀបចំកន្លែងបើកជាហាងនេះឡើង ហើយគ្រាន់តែចំណាយពេលវេលារៀបចំកន្លែងនោះគឺអស់ជាង ២ ខែឯណោះ។ តែសំណាងល្អចុងភៅគឺជាប្រពន្ធរបស់ខ្ញុំ និងប្អូនថ្លៃ និងមានបងប្អូនខាងសាច់ញាតិប្រពន្ធមកជួយការងាផងដែរ»។
ក្រោយពីចូលប្រឡូកនៅក្នុងវិស័យសិល្បៈកំប្លែងបានប៉ុន្មានឆ្នាំ ហើយក៏មានកិត្តិយសកេរ្តិ៍ឈ្មោះខ្លាំងគួរសមនោះ នាយក្រិន ក៏បានផ្សារភ្ជាប់ចំណងស្នេហ៍ជាមួយនារីអ្នកអ៊ុតសក់ម្នាក់នៅឯក្រុង ព្រះសីហនុ ឈ្មោះ ហ៊ិន ចាន់ធឿន ហៅ សុវណ្ណារ៉ា ហើយពួកគេក៏បានសម្រេចចិត្តចូលរោងការគួរឲ្យភ្ញាក់ផ្អើលកាលពី ថ្ងៃទី ២៨ ខែឧសភា ឆ្នាំ២០០៩ ក្រោមការជួយឧបត្ថម្ភនាយកុយ ជាឪពុកធម៌ និងមានកូនប្រុសដំបូង ថ្ងៃទី៩ ខែមេសា ឆ្នាំ២០១០ ឈ្មោះ សុជុន ចាន់វីរៈ។
ខណៈមួយឆ្នាំក្រោយអ្វីដែលកាន់ឲ្យមាននូវការភ្ញាក់ផ្អើលដ៏ខ្លាំងទៀតនោះស្ងាត់ៗ នាយក្រិន ក៏ស្រាប់តែបានដាក់នូវពាក្យប្តឹងលែងលះទៅដល់ឯសាលាដំបូងរាជធានីភ្នំពេញ កាលពីថ្ងៃទី ៨ ខែកុម្ភៈ ឆ្នាំ២០១១ ដែលជាការសុំផ្តាច់នូវចំណងស្នេហ៍ជាមួយប្រពន្ធទី ១ របស់លោក គឺនាងហ៊ិន ចាន់ធឿននៅក្រោមមូលហេតុថា ការរស់នៅជាមួយមិនចុះសម្រុងនឹងគ្នា៕
ប្រភព៖ ភ្នំពេញប៉ុស្ត៏
នាយក្រិនមិនទាន់ការប្រពន្ធទី ២ យកលុយបើកហាងគ្រឿងក្លែម
Reviewed by Unknown
on
October 17, 2016
Rating:
Reviewed by Unknown
on
October 17, 2016
Rating:

No comments: